ILOILO CITY- Ginkumpirma sang Traffic Enforcement Unit sang Iloilo City Police Office nga wala pa sang bisan isa ka pamilya sang mga biktima sa natabo nga Baldoza tragedy ang nakapalapit agud magproseso sang pagpasaka sang kaso batok sa responsable sa aksidente.
Sa interview sang Bombo Radyo kay Pol. Lt. Col. Ethan Estaya, pinuno sang Traffic Enforcement Unit sang Iloilo City Police Office, iya ginpahayag nga sa ila bahin, hulaton lang nila ang pamilya sang mga biktima bangud indi man nila mapangunahan ang pagpasaka sang kaso.
Samtang, ginkumpirma naman ni Estaya nga gin-release na kahapon ang personnel sang City Disaster Risk Reduction and Management Office nga si Darryl Darwin Thulasidas, chief sang Urban Search and Rescue.
Si Thulasidas amo ang nagsaka sa water tanker truck nga una nagbunggo sa lechon stand kag botika kag sang iya ginmaneho ang nakabunggo nga truck, didto nadulaan ini sang kontrol kag gin-arado ang mga nagatumpok nga mga tawo kun sa diin duha ang patay kag 17 ang pilason.
Matandaan nga ginpaidalom ini sa hospital arrest bangud yara ini sa ‘state of shock’ matapos ang aksidente.
