GUIMARAS– Ginpang hatagan sang priority number ang mga na stranded sa RORO wharf agud ma kontrol ang mga pasahero nga magasakay subong nga adlaw.
Sa interview sang Bombo Radyo kay Sharlyn Bedaña isa sa mga nastranded, iya ginpahayag nga masobra lang sa 200 ka mga pasahero ang ginhatagan sang priority number nga unahon nga pasakyon sa barko nga naga byahe halin sa isla sang Guimaras padulong sa syudad sang Iloilo.
Suno kay Bedaña, maayo ang nangin pag akomodar sang mga staff sang Jordan Wharf sa nastranded nga mga pasahero kun sa diin ginpanghatagan sila sang hiligdaan, gin serbihan pa sila sang panihapon kag ginsaylo sila sa Gym sang Jordan nga nagserbi evacuation center sang banwa.
Dugang pa sang natungdan kalabanan mga estudyante nga magapadulong sa Iloilo agud maglagas sang ila klase ang mga kaupod nila nga nastranded.
Ginpahayag ni Bedaña nga gina ekspektar nila nga maga sugod sa liwat ang byahe sang roro pakadto sa Iloilo humalin ala singko tubtob ala sais sang aga subong nga adlaw.
