Sa baylo nga mag-selebrar sang Paskuwa sa Pilipinas subong nga tuig, napurnada ang pagpauli sang pila ka mga Pinoy nga yara subong sa Lesotho bangud sa bag-o lang nga ginpatuman nga travel ban.
Ang Lesotho, isa ka gamay nga pungsod sa southern Africa, ang nalakip sa temporary ban list sa Pilipinas bangud sang pamahog dala sang Omicron, ang bag-o nga COVID-19 ‘variant of concern’.
Ginsuspinde man sang Pilipinas ang byahe halin sa South Africa, Botswana, Namibia, Zimbabwe, Eswatini, kag Mozambique. Tubtub sa Disyembre 5 ang suspension.
Katuyuan sini nga malikawan nga makasulod ang Omicron variant sa pungsod.
Isa sa direkta nga naapektuhan sang gulpi nga pagpatuman sang ban amo si Steve Guyana Capuli, residente sang Paco, Manila kag kapin anum ka tuig na nga nagatrabaho sa amo nga pungsod.
Sa interview sang Bombo Radyo kay Capuli, ginpahayag sini nga 2018 pa siya katapusan nga nagpauli sa Pilipinas kag plano kuntani niya nga magbakasyon sa maabot nga Disyembre 9. Bangud ginadumilian ang byahe sa amo nga petsa, Pebrero na lang mapauli si Capuli.
“Sobrang dami po ang apektado na uuwi naming kababayan. Kasi yung ibang factory dito, nagsasara na din po, kaya yung ibang Filipino pinapauwi na this December,” suno kay Capuli. Bangud sang ban, extended anay ang pagtinir sang mga Pinoy sa amo nga pungsod.
Wala sang kaso sang Omicron variant sa amo nga pungsod kag normal ang hulag sang tanan suno kay Capuli: ‘wala sang panic.’
Isa sa ginalantaw rason kun ngaa nadala ini sa ban list amo nga wala sang direct international flight halin sa Lesotho padulong sa Pilipinas, bangud kinahanglan pa nga mag-agi sa South Africa. Sa South Africa una nga na-detect ang amo nga variant of concern. ##
