Ginsapol ni Iloilo City Mayor Jerry Trenas ang mga market vendors sa syudad agud nga maistoryahan ang redevelopment sa duha ka mga merkado ukon ang pagpaidalom sa public-private partnership (PPP) scheme.
Ini amo ang Iloilo Central Market ukon ang “Tienda Mayor” kag ang Iloilo Terminal Market ukon ang “Super”.
Sa interview sang Bombo Radyo sa alkalde, iya ginpahayag nga nagtanyag na ang SM Prime Holdings sang lease contract sa duha ka nasambit nga merkado.
Ginpresentar sa mga market vendors ang ini nga mga plano, kag ginpahayag sang alkalde nga tingbon man ang mga suhestyon sang mga manugbaligya kag iga-incorporate sa plano sang SM Prime.
Una na nagpasalig ang alkalde nga wala sang may ma-displace sa mga market vendors kun maplantsa na ang PPP kag ma-umpisahan na ang redevelopment.
Tuyo sini nga mahatagan ang syudad sang sustainable multi-use market complex nga may maayo nga business activities.
Matinlo, convenient, kag safe nga mga merkado ang ginpromisa sang alkalde kun mapatuman na ang PPP.
