ILOILO CITY – Nagakadapat nga kakson sa pwesto ang mga police officials nga na-angut sa P6.7 billion worth sang shabu nga na-recover sa Manila sang nagligad nga tuig suno kay Senator Ronald “Bato” Dela Rosa.
Suno kay Dela Rosa nga anay pinuno sang Philippine National Police, nagakadapat man nga magpasaka sang kaso batuk sa mga opisyal sa tion nga may yara na sang nagaka-igo nga ebidensya batuk sa ila.
Ini ang pahayag sang senador matapos ang panawagan ni Interior Secretary Benhur Abalos sa duha ka mga police generals kag pila ka mga police officers nga mag-file sang leave samtang nga nagapadayon ang fact-finding investigation sa multi-billion-peso drug haul.
Kung madumduman, sang October 2022, nakuha ang 990 kilograms ukon P6.7 billion nga balor sang drug paraphernalia sa asud-asud nga buy-bust operations sa Manila nga amo ang ginakabig nga largest haul sa pungsod.
Lakip sa mga na-aresto amo si Police MSgt. Rodolfo Mayo nga gilayon nga gin-dismiss.
Una na nga ginpahayag ni Philippine National Police – Drug Enforcement Group director Police Brigadier General Narciso Domingo nga siya kag ang siyam ka iban pa nga police officers ang maga-file sang leave of absence agud nga maghatag sang ligwa sa imbestigasyon sa drug case.
Sang nagligad nga bulan, nagpatigayon sang hearing sa amo nga kaso ang Senate Committee on Public Order and Dangerous Drugs nga ginapamunuan ni Dela Rosa.
Ginkumpirma niya nga ang mga pangalan nga ginbuyagyag ni Abalos ang naggwa sa legislative inquiry apang suno sa iya, nadesisyunan nga ipa-iway ang masunod nga hearing bangud ginahulat pa niya ang resulta sang imbestigasyon sang National Police Commission.
