Liwat nga nabuhi ang panawagan nga i-shutdown ang Philippine Offshore Gaming Operators (POGO) sa pungsod kasunod sang insidente sang pag-kidnap sa isa ka Chinese national nga gin-utdan pa sang tudlo.
Naguwa sa imbestigasyon nga isa ka POGO manager ang amo nga biktima. Arestado naman kag nagapangatubang sang kaso nga kidnapping ang tatlo ka Chinese nationals, samtang ginapangita pa ang 25 ka iban pa nga mga suspek lakip na ang lima ka mga Pinoy.
Suno kay Senator Grace Poe, mas naga-agresibo kag brutal na gid ang foreign kidnap syndicates bangud sa pigado nga monitoring sang otoridad. Nagapati nga senadora nga yara sa law enforcement ang problema kun ngaa nagapadayon ang kaso sang kidnapping sang Chinese nationals sa pungsod.
Nagpahayag naman si Senator Risa Hontiveros nga padayunon niya ang panawagan nga untaton ang operasyon sang POGO nga suno sa iya isa ka sahi sang pagpamahog sa national security sang publiko.
“I will continue to call on the Senate to expel POGOs from the country. The entire industry is a threat to our national security and to our people,” pahayag ni Hontiveros.
Ini nga panawagan ang suportado man sang Movement for the Restoration of Peace and Order nga nagsiling naman nga ang POGO ang nagahatag ligwa sa international syndicates nga magsulod sa Pilipinas. #
