Ginaduso sang mga senador nga imbestigaran ang kontrobersyal nga pagdaog sang 433 ka manugtaya sa P236 million Grand Lotto jackpot sang Philippine Charity Sweepstakes Office (PCSO).
Suno kay Senate Minority Leader Aquilino “Koko” Pimentel III, maga-file siya sang resolution agud mausisa kun ngaa napaktan sang 433 bettors ang winning combination kag agud masiguro man nga may integridad pa sa gihapon ang lotto games sa pungsod.
Kun si Pimentel ang pahambalon, “one in a billion” ang tyansa nga makadaog ang masobra 400 ka tawo sang pareho nga winning numbers. Makaduluda man suno kay Pimentel nga divisible by 9 ang winning combination nga amo ang 09-45-36-27-18-54.
Suportado man ni Senator Risa Hontiveros ini nga plano agud nga madula man ang pagpangduha-duha sang mga tawo nga ginmanipula ang resulta sang amo nga lotto draw.
Sabado sang gab-i sang ginpatigayon ang 6/55 lottery draw.
Tungaon sang 433 ka winners ang P236,091,188.40 nga premyo; buot silingon, wala sang instant multimillionaire bangud kada isa sa ila ang magadala lang sang P545,245 nga wala na nalakip ang tax deductions.
Sa ginpakita sang PCSO nga listahan, nakasaad nga may 10 ka winners nga nagikan sa Iloilo.
Magluwas sa Iloilo, may iban man nga halin sa Western Visayas: 3 sa Aklan, 3 sa Negros Occidental, isa sa Antique, kag isa sa Capiz.
‘WALA SANG IREGULARIDAD’
Ginapanindugan naman sang PCSO nga “natural occurrence” ang pagdaog sang 433 ka manugtaya kag wala sang natabo nga iregularidad.
Suno kay PCSO General Manager Melquiades Robles, nag-hold on ang mga manugtaya sa number 9 nga ginakonsiderar lucky number amo man sa multiples sini.
Sa game of chance suno kay Robles, wala sang husto, wala sang sala; apang sa sini nga kaso, nabayaran gid suno sa iya ang loyalty sang manugtaya, ugaling natabuan nga madamo lang sila.
Gin-athag man sang PCSO nga may integridad ang pre-draw procedures kag gin-conduct sa presensya sang observers. Lakip na diri ang machine inspections, draw ball case selection, kag weighing kag loading sang official draw balls. ##
