ILOILO CITY – Apisar nga nagdesisyon ang European Union nga batunon ang certificates para sa mga seafarers nga gin-isyu sang Pilipinas, nagpanawagan ang mga senador para sa padayon nga skills training kag industry-wide reforms.
Ginpanginbulahan ni Senator Risa Hontiveros ang government agencies para sa ila pagtinguha kag nagalaum ini nga maplastar na ang mga seryoso nga mga reporma.
Suno sa iya, importante nga talupangdon ang mayoriya sa negative findings bangud sa kakulangan sa education system.
Nagpanawagan man ini sa Commission on Higher Education kag sa Maritime Industry Authority nga padayunon ang pagkay-o sang mga kakulangan.
Ginpahayag man niya nga magapadayon man ang iya pagduso agud nga mapasar ang Magna Carta of Seafarers agud nga mahatagan sang proteksyon ang kimatarong sang mga seafarers.
Suno naman kay Senator Grace Poe, dapat nga may yara sang padayon nga training agud nga mapasanyog ang viability sang Filipino workers.
Pahayag sang senadora, indi masarangan sang pungsod nga madulaan sang trabaho ang mga Pilipino nga mahimo maka-apekto sa ekonomiya sang Pilipinas kag sa minilyon nga mga pamilya.
Ang kalidad sang maritime education ang dapat nga magpasiguro sang seguridad sang mga tripulante kag ma-secure ang pamilya sang mga Filipino seafarers.
Samtang, suno naman kay Senator Joel Villanueva, nagasalig ini sa maritime authorities sa pungsod kag mapadayon nila ang pagpabaskog sang mga programa agud nga mapanami ang compliance sa International Convention on Standards of Training, Certification and Watchkeeping for Seafarers (STCW) Convention.
Kung madumduman, gin-anunsio sang European Commission nga padayon ini nga magabaton sang certificates nga gin-isyu sa mga seafarers sa Pilipinas pila ka bulan matapos ang paandam nga i-ban ang Filipino maritime workers bangud sa sulit-sulit nga kapaslawan sa pagpasar sa European Maritime Safety Agency evaluation sa sulod sang 16 ka tuig.
Suno kay Department of Migrant Workers Secretary Susan Ople, may yara sang ginabanta 50, 000 ka mga trabaho sang Filipino masters kag officers nga sakay sa European vessels ang nasalbar.
