ILOILO CITY – Dapat nga magtuon na ang Department of Health (DOH) sa mga leksyon sang COVID-19 pandemic kag pabaskugon pa ang pagplano kag ang surveillance sang monkeypox cases sa pungsod suno sa pila ka mga senador.
Ini matapos man nga na-record ang labing una nga kaso sang monkeypox sa pungsod kahapon.
Sa report sang DOH, ang pasyente ang isa ka 31 anyos nga nagikan sa isa ka pungsod nga may kaso na sang amo nga virus.
Suno kay opposition Senator Risa Hontiveros, nagapanawagan ini sa administrasyon nga doblehon pa ang surveillance capacity sang DOH.
Apisar nga wala pa sang may gin-designate nga health secretary, dapat nga padayon ang pagpabaskog sang kapasidad sang health system sang pungsod sa pagbantay kag pag-screen sang mga suspected cases sang monkeypox.
Suno naman kay Senate Minority Leader Aquilino “Koko” Pimentel III, ang DOH ang dapat nga magdihon na sang plano agud nga mapunggan ang paglapta sang monkeypox sa pungsod.
Suno sa iya, dapat nga may plano apang dapat nga indi mag-panic.
Sa bahin naman ni Senate Health and Demography Committee Chairman Bong Go, nagpanawagan man ini sa DOH nga pasangkaron pa ang awareness, detection, disease surveillance, kag containment efforts.
Nagaplano man ini nga mag-file sang Senate resolution nga nagahingyo sa DOH kag sa iban pa nga relevant agencies nahanungod sang ila specific nga plano agud nga mapasiguro ang capability sa healthcare system.
Si Senator JV Ejercito ang nagpahayag nga ang una nga kaso sang monkeypox sa pungsod kadungan sang COVID-19 pandemic ang dapat nga mag-trigger sa gobyerno nga mag-akto.
Gin-emphasize sang mamalidha ang importansya sang insakton nga impormasyon nga ihatag sa publiko agud nga indi mag-panic ang tawo.
Nagpanawagan man ini kay President Ferdinand “Bongbong” Marcos Jr. nga maghimo sang task force kaangay sa Inter-Agency Task Force for the Management of Emerging Infectious Diseases agud nga masigurado ang coordinated response halin sa gobyerno.
Ini ang dapat nga bug-usan sang mga opisyal nagikan sa health, quarantine, immigration kag iban pa nga related agencies.
Nahibaluan nga suno sa DOH, ang monkeypox ang isa ka virus nga naglaton sa tawo pinaagi sa close contact sa infected nga tawo ukon sapat kag mangin sa contaminated materials.
Ang una nga sintomas sini amo ang paghilanat, pagsakit sang ulo, muscle pain, fatigue, rashes kag iban pa.
