ILOILO CITY – Nanuhay-tuhay ang opinyon sang mga senador may kaangtanan sa pagdumdom sang ika-50 nga anibersaryo sang pagdeklarar sang martial law ni anay President Ferdinand Marcos, Sr., nga amay ni Presidente Ferdinand Marcos, Jr.
Para kay Senator Jinggoy Estrada, ang mga Pilipino ang naka-move on na kun basehan ang pagdaog ni Ferdinand “Bongbong” Marcos, Jr. sang nagligad nga eleksyon.
Si Estrada ang kabahin sang Uniteam slate nga ginapamunuan ni Marcos.
Ang pahayag ni Estrada ang kaangay man sa nangin sabat ni Senator Robin Padilla nga kabahin man sang Uniteam.
Suno pa sa iya, kun ano ang malain nga ginhimo ni Marcos Sr. ang indi na dapat nga ibasol pa sa iya mga nabilin nga pamilya.
Apang, suno kay Senator Aquilino “Koko” Pimentel III, nga anak sang isa ka martial law victim, kinahanglan sang pungsod nga dumdumon ang gintawag niya nga “dark period.”
Dugang pa niya, ang nagakaigo nga paagi sa pag-move on nagikan sa mapait nga inagihan sa Martial Law amo nga dapat hatagan sang importansya ang basic rights sang mga pumuluyo kag magtuon nagikan sa amo nga inagihan.
Suno naman kay Senator Risa Hontiveros, indi bastante nga dumdumon lang kundi dapat nga padayunon ang pagkuha sang leksyon humalin sa tagsa tagsa.
Ginalauman naman ang pagtinguha sang online troll agud nga indi paghatagan sang importansya ang ginakomemorar subong nga adlaw.
Kung matandaan, sang Septyembre 21, 1972 sang ginpirmahan ni Marcos, Sr. ang Proclamation No. 1081.
Ang deklarasyon ang naglawig tubtob January 1981 nga napun-an sang human rights violations kag madata nga kurapsiyon.
Suno sa report sang global human rights watchdog nga Amnesty International, nagdangat sa 100, 000 ang nangin biktima sang martial law nga nagpatay sang 3, 000 ka mga tawo, 34, 000 ang gin-torture kag 70, 000 ang gin-aresto.
