Ginadumilian na ang mga military personnel nga maggamit sang bantog nga social media application nga TikTok bangud sa kahangawa nga posible ginagamit ini sa pagpang-espiya sang China.
Suno kay Armed Forces of the Philippines (AFP) spokesperson Col. Francel Margareth Padilla, naabisuhan na ang mga personnel nga likawan ini nga application nga himo sang China kag indi man ini pagbuksan sa ila nga personal ukon sa government-issued mobile phones ukon sa iban pa nga devices.
Ginpaathag pa ni Padilla nga base sa resulta sang pagtuon sa Estados Unidos sang Amerika, ini nga application ang may yara sang listening capability kag maka-monitor sang aktibidad sang tawo paagi sa cellphone.
Kun i-download ini sang tag-iya sang cellphone ukon device, may igahatag man nga permission agud maggamit ang microphone kag camera. Buot silingon suno sa iya, may kontrol na ini sa cellphone kag mahimo na gid makapamati-bati sa tion nga paandaron na ang device.
Halimbawa, may mga tion nga may gina-istoryahan ang duha ka tawo sa cellphone, kag pagkatapos sini, may nagaguluwa na nga sponsored advertisements sa social media sang tag-iya sang cellphone nga naga-interes sa iya. Ini nga ideya ang posible nakuha didto sa gina-istoryahan sang duha ka tawo paagi sa cellphone.
Pahayag pa ni Padilla, madugay na nga ginpatuman ang TikTok ban sa mga military personnel apang wala gid lamang nasapubliko ini nga pagsulundan.
Ang National Security Council mismo suno sa iya ang nagsuhestyon sang ideya nga dapat na i-ban ang paggamit sang TikTok.
Nahibaluan nga antes sini, pila ka ka mga pungsod ang nag-ban sa paggamit sang TikTok lakip na ang Estados Unidos sang Amerika, India, kag Canada.
Istrikto ini nga ginadumilian sa government phones kag state workers sa tunga man sang kahangawa nga ini nga application ang posible maghatag sang sensitive use data sa Chinese government.
