ILOILO CITY – Nagpasalig sanday Senate Minority Leader Aquilino “Koko” Pimentel III kag ang iya kaalyado nga si Senator Risa Hontiveros nga i-rekomendar ang realignment sang Confidential and Intelligence Funds sa ginaduso nga P5.268-trillion 2023 national budget sang Marcos Jr. administration.
Suno kay Pimentel, ang portion sang P9.3 billion nga Confidential and Intelligence Funds ang kuhaon sa mga government agencies nga wala sang connection sa intelligence ukon information kag data gathering.
Lakip sa mga ahensya nga ginatumod sang minority bloc amo ang Office of the Vice President kag Department of Education nga ginakaptan ni Vice President Sara Duterte-Carpio.
Sa tuig 2023, ang Office of the Vice President ang makabaton sang P500 million nga confidential fund kag ang Department of Education ang may yara sang P150 million confidential fund.
Suno kay Hontiveros, nagalaum ini nga ang mga kaupod niya sa senado ang magpasugot nga wala sang nagakaigo nga rason nga hatagan sang confidential fund ang education agency kag magamit ini sa mas importante nga prayoridad para sa mga kabataan.
Maga-propose ini sang motion nga amyendaran ang proposed budget kag realignment.
Suno naman kay Pimentel, ang Confidential Fund sa Office of the Vice President kag Department of Education ay gin-categorize nga bag-o.
Buot silingon, wala ini nalakip sa 2022 budget.
Dugang pa niya, ang P500 million ang mapuslan sa tion nga i-realign ini sa Philippine Postal Corporation ukon sa iban nga programa ukon ahensya nga nagakinahanglan sang Supplemental Feeding Program; Senior Citizen Law; Bureau of Fire Protection; Children’s Hospital, kag National Anti-Poverty Commission.
Apang ini ang wala ginpaboran ni Angara.
Suno sa iya, dapat indi ini pagtandugon bilang respeto kay Vice President Duterte.
Nagpasalig si Pimentel sa publiko nga iduso sa gihapon nila ang realignment sang pondo sa iban nga ahensya.
Sa tion nga mapaslawan sila sa ila pagduso, ang Senate majority bloc ang magapaathag sa publiko kun ngaa nga ginpabay-an nila ang kinahanglanon sang iban nga government agencies.
Suno sa iya, ilakip man nila ang Office of the President sa ila nga motion.
Bilang compromise, pabay-an na nila ang P2.5 billion nga Confidential Funds apang indi ang P2.5 billion nga intelligence fund.
Ini bangud nga indi man intelligence practitioner ang presidente.
Una na nga nagpaandam si Former Senate President Franklin Drilon nga ang Confidential and Intelligence Funds ang mangin bukas sa pagpang-abuso sa tion nga indi ma-monitor.
