ILOILO CITY – Pormal na nga napirmahan ang Memorandum of Agreement sa tunga sang Iloilo City Government kag Department of Health 6 nga maga designar sa Western Visayas Medical Center bilang COVID-19 hospital sa syudad sang Iloilo.
Sa interview sang Bombo Radyo kay Iloilo City Mayor Jerry Treñas, iya ginpahayag nga paagi sa ginpirmahan nga kasugtanan idesignar ang Western Visayas Medical Center nga magatatap sa mga pasyente sang Coronavirus Disease 2019.
Suno kay Treñas, ini man ang nahisugtan na sang tanan nga mga ospital sa syudad sang Iloilo.
Dugang sang natungdan, mahimo nga amat-amat na nga pasayluhon ang mga non-COVID patient pakadto sa nagkalain-lain nga ospital sa syudad sang Iloilo kag isulod naman ang mga pasyente nga nag positibo sa Coronavirus Disease 2019 lakip man ang mga Persons Under Investigation nga may severe cases sa Western Visayas Medical Center.
Santo man sa pahayag sang alkalde, mas maayo nga ipahamtang sa isa lang ka lugar ang mga nagpositibo sa nasambit nga balatian agud malikawan nga maglapta pa ini kag malatnan ang iban nga mga pasyente.
