ILOILO CITY – Maathag nga indi pa mahimo maka operate ang More Electric and Power Corporation bilang electric power provider sa syudad sang Iloilo.
Sa interview sang Bombo Radyo kay Iloilo City Councilor Rommel Duron, chairman sang Committee Energy and Public Utilities, sa Iloilo City Council, iya ginpahayag nga malawig pa ang proseso nga sundon antes maka operate ang More Electric and Power Corporation ilabi na nga wala pa ang mga ini sang mga equipment.
Suno kay Duron, indi man mahimo nga mapa-untat ang operasyon sang Panay Electric Company bangud madamo sang maapektuhan.
Natukiban nga humalin sang tuig 2017 tubtub subong nga tuig, wala na nahatagan sang business permit ang Panay Electric Company bangud indi sila kumporme sa ginasukot nga Real Property Tax sang City Treasurer’s Office.
Nahibaluan nga santo sa nangin desisyon sang Mandaluyong Regional Trial Court, ginapunggan na ang More Electric and Power Corporation nga padayunon pa ang expropriation proceedings.
Magluwas sini, wala naman ginhatagan sang Certificate of Public Convenience and Necessity sang Energy Regulatory Commission ang MORE Power bangud indi pa handa ang kompaniya nga mangin electric power provider sa syudad sang Iloilo.
