ILOILO CITY – Natalana nga kuhaon sang Department of Education ang Mother Tongue bilang isa ka subject para sa Grades 1 to 3 agud nga ma-decongest ang existing nga curriculum.
Suno kay Education Undersecretary Epimaco Densing III, indi na kinahanglan ang 50 ka minutos nga Mother Tongue bangud nga adlaw-adlaw man ini nga ginagamit sang mga kabataan sa eskwelahan, sa kumunidad kag sa sulod sang panimalay.
Igabulos sa amo nga subject ang national reading program kag national math program.
Ini nga desisyon ang nahimo matapos ang binulan nga konsultasyon upod sa nagkalain-lain nga sektor kag stakeholders sa pag-revise sang curriculum halin sa Kinder tubtob Grade 10 nga nangin subject for review.
Ang mga nabilin nga subject sa curriculum amo ang mga masunod: English, Filipino, Math, Araling Panlipunan, Good Manners and Right Conduct, Physical Education, Music, and Arts.
Apang, ang mother tongue lakip ang kaugalingon nga dialect ang gamiton sa gihapon bilang medium of instruction bangud mandato na ini sa K to 12 law.
Samtang, ang mga pribado nga mga eskwelahan ang pahanugutan na sa pagpatuman sang blended kag full distance learning modes pagkatapos sang Nobyembre 2.
Gin-amyendaran ang una nga order nga naga-require sa private schools nga magsaylo na sa face-to-face classes sa amo nga petsa.
Apang, ang mga public schools ang ginalauman nga magpatuman sang full in-person classes santo sa DepEd Order No. 34 series of 2022 magluwas lamang sa mga gin-exempt sang regional directors, institutions nga apektado sang natural disasters kag ang nagapatuman sang alternative delivery modes.
