ILOILO CITY- Napadala na ni Msgr. Meliton Oso, director sang Jaro Archdiocesan Social Action Center ang sulat sa Office of the Ombudsman agud imbestigaran ang kontrobersyal nga Ungka flyover.
Ang nasambit nga flyover ang nagakonekta sa Barangay Ungka, Jaro, Iloilo City kag Barangay Ungka II, Pavia, Iloilo.
Sa interview sang Bombo Radyo kay Oso, iya ginpahayag nga ang nasambit nga sulat ang iya ginpadala mismo kay Ombudsman Samuel Martires.
Suno kay Oso, luyag sini nga magpangayo sang bulig sa Ombudsman agud magpatigayon sang MOTO PROPRIO investigation sa nasambit nga flyover.
Ginpatpat ni Oso sa iya sulat nga ang Ungka flyover ang may original budget nga P680 million.
Apang matapos ang atrasado nga pagpatapos sang proyekto, natukiban nga depektibo ini.
Naggasto naman ang gobyerno sang P13 million para sa consulting firm agud tun-an ang depekto sa flyover.
Matapos sini, gin-propose nga maggasto naman sang P250 million agud kay-uhon ang proyekto.
Apang suno kay Oso, indi pa masigurado kun bala safe ini nga agyan sang mga commuters.
Nagapati man ang natungdan nga dapat may manabat sa natabo nga kapalpakan.
Ini ang sa pihak sang panawagan sang Department of Public Works and Highways nga likawan ang pagbinasulay kag sa baylo magpangita sang solusyon.
Ginpa-anggid man ni Oso sa kalbaryo ang naeksperyensyahan sang mga pumuluyo sang syudad kag probinsya sang Iloilo bangud sa proyekto.
Una, tuman ka atrasado ang proyekto sa diin gin-umpisahan ini sang Enero 2020 kag ang orihinal nga deadline nga matapos ini amo ang Hulyo 2021.
Apang tubtub subong, wala pa ini magamit.
Ikaduha, nagtuga ini sang tuman kagutok nga trapiko.
Ikatatlo, sa tunga sang inflation, nauyangan ang kwarta sang publiko.
