Wala ginpalampas ni Msgr. Meliton Oso, director sang Jaro Archdiocesan Social Action Center, sa iya nga sermon sa Holy Mass, Mayo 21, ang kontrobersyal nga P680-Million Ungka flyover.
Ginpahangop sini nga indi dapat pag-hipus-hiposan ang “overspending” sang gobyerno kag ang “kalbaryo” sang mga Ilonggo.
Ginhingyo sini sa publiko nga mag-demand sang “maid-id nga imbestigasyon” agud nga mapasabat ang mga involved sa proyekto — International Builders Corporation man nga amo ang kontraktor ukon ang Department of Public Works and Highways (DPWH).
Ginmuno man sini ang dugang nga P250-million nga kuhaon sa kaban sang gobyerno agud ipa-repair ang amo nga proyekto apisar wala pa man gani ini napuslan sang mga motorista.
“Kun buhi si Hesus, He will question this project!,” pahayag ni Oso. Pahayag sini sa publiko, “I hope you will do same. This is dong justice.”
Sa separado nga interview sang Bombo Radyo, ginpahayag ni Oso nga magasulat ini sa Office of the Ombudsman agud nga magpatigayon ini sang imbestigasyon. Naghingyo man ini sa mga sumilimba nga bahaon sang sulat ang Ombudsman agud nga malab-ot ang tuyo nga imbestigasyon. #
