ILOILO CITY – Problema na nga daan humalin sang una ang nagalinapta nga basura sa tion nga may ginapatigayon nga aktibidad sa syudad sang Iloilo.
Sa interview sang Bombo Radyo kay Jovan De la Peña, sectoral leader sang enforcement team sang City Environment and Natural Resources Office, iya ginpahayag nga indi malikawan ang paglinapta nga basura ilabi na kun may ginapatigayon nga aktibidad kasubong sang Opening Salvo sang Dinagyang Festival 2020.
Suno kay De la Peña, wala nagakulang ang Iloilo City Government sa pagpahanumdom sa tanan nga ihaboy sa basurahan ang higko sa baylo nga ihaboy lang sa dalan.
Ginpahayag ni De la Peña nga pagkatapos sang Opening Salvo nga ginpatigayon kahapon sang hapon, nakit-an ang paglinapta sang basura sa diin kalabanan sa mga nagahaboy sini amo ang kabataan.
Bangud sini, ginatun-an sang City Environment and Natural Resources Office ang mangin deployment sang personnel agud nga mapabilin ang katinlo sa Dinagyang highlights sa Enero 25-26.
Ginakalipay naman sang natungdan ang pahayag ni Iloilo City Mayor Jerry Treñas nga magpahamtang sang garbage bin ukon basurahan sa palibot sang syudad agud nga wala na sang rason nga maglinapta pa ang basura.
Kun kaisa suno kay De la Peña, ginapatalikod lang sang iban ang mga nagabantay agud nga makahaboy sang basura sa bisan diin lang nga bahin sang syudad.
Ang problema lang amo nga kun kaisa amo ang mga basa nga basura ukon barbecue stick nga indi mahimo nga isulod sa bulsa ukon bag.
