Ginkumpirma sang mga navy officials sa Indonesia nga nakit-an na ang Indonesian submarine nga may sakay nga 53 ka mga crew nga na-missing halin sang Mierkules.
Suno kay military chief Marshal Hadi Tjahjanto, napihak ang submarine sa tatlo ka bahin kag nakit-an sa Bali Sea.
May nakit-an man ang mga rescuers nga life vest kag iban pa nga mga objects nga ginapatihan iya sang mga nakasakay sa amo nga submarine — 44 anyos nga KRI Nanggala-402 nga nadulaan sang contact sa otoridad sang Mierkules samtang nagahanda sa pagpatigayon sang torpedo drill.
Suno pa kay Tjahjanto, kun basehan ang mga narecover nga ebidensya, naglugdang ang KRI Nanggala kag lunsay patay ang 53 ka crew nga sakay sini.
Ginpahayag naman ni Navy chief of staff Yudo Margono nga indi dapat pagbasulon ang crew bangud sang natabo ang aksidente.
May kaangtanan diri, nagpadala naman si President Joko Widodo sang mensahe sang simpatiya sa pamilya sang 53 ka napatay nga crew.
Sang nadulaan sang contact ang amo nga submarine sang Mierkules, nagbulig ang dinosena ka mga helicopters kag mga barko sa pagpangita kag may assistance man nga ginhatag ang Estados Unidos, Australia, Singapore, Malaysia, kag India.
