ILOILO CITY – Wala sang gahom ang isa ka hepe sang Iloilo City Police Station 1 sa pagdesisyon nga indi magpasaka sang kaso batok sa pulis nga nagprenda ang iya service firearm kag sa ulihi gingamit sa pagluthang patay sa Chinese businessman sa dalan Iznart, Iloilo City Proper.
Ang ginatumod nga pulis amo si Police Corporal Val Allan Lisay, miyembro sang Mandirigmang Mang-aawit sang Police Regional Office VI.
“Ang iya [Police Major Mark Ivan Salvo] nga statement, daw statement sang abogado ni Lisay [Police Corporal Val Allan Lisay]. Salvo is not in the position to make the necessary determination kay indi man siya fiscal, indi man siya korte nga magresolve,” pahayag ni Celis.
Matandaan nga una na nga ginpahayag ni Police Major Mark Ivan Salvo, station commander sang Iloilo City Police Station 1 nga indi na sila magpasaka sang kaso kriminal batok kay Lisay sa rason nga wala siya sa Dalan Iznart sang ginhimo ang krimen kag wala ini sang intensyon nga ipagamit sa suspek nga si Andy Mahinay alias Hapon ang iya nga pusil agud ipapatay ang biktima nga si Willie Sy, negosyante sang fashion accessories sang Nobyembre 12.
Sa exclusive interview sang Bombo Radyo kay Atty. Joseph Celis, Director sang National Police Commission Region 6, iya ginpahayag nga daw kaangay nga nagatindog si Salvo bilang abogado ni Lisay.
Suno kay Celis, indi fiscal ukon hukom si Salvo rason nga indi siya dapat maghambal nga indi na sila magpasaka sang criminal complaint batok kay Lisay.
Ginpahayag sang natungdan nga bilang isa ka pulis, nagakadapat nga wala ini sang ginaapinan apisar kabaro pa niya ang naangot sa kontrobersiya.
Matandaan nga santo sa una nga alegasyon ni Lisay, ginprenda lang niya ang iya nga government-issued firearm sa suspek nga si Mahinay apang wala siya naglaum nga gamiton ini ni Mahinay sa krimen.
Samtang, una na nagpahayag ang Police Regional Office VI nga kun mapamatud-an ang sala ni Lisay, kaso kriminal ang ipasaka bangud accomplice ukon kahimbon ini sa krimen; kag sa kaso administratibo, ipasaka ang kaso nga malversation of public property kag grave misconduct.
Sa subong, napaidalom gihapon sa restrictive custody si Lisay.
Samtang ginpanugyan naman ni Celis kay Lisay nga magresign na lang bilang katapo sang Philippine National.
Suno kay Celis, santo sa iya pagpanalawsaw sa background ni Lisay, problemado ini nga sahi sang pulis.
Madamo ma sang bisyo suno kay Celis si Lisay kay nagapaguba lang siya sa imahe sang mga pulis.
“Kabalo ko si Lisay ni, indi ni dapat magtinir sa service kay problemado klase police ni. Damo ni siya bisyo. Kun bisyuhan ka nga klase sang pulis, ginaguba mo lang ang organisasyon sang PNP.”
Indi man lango-lango suno sa natungdan ang penalidad nga nagahulat sa tion nga mapamatud-an nga nakasala si Lisay
