Madugangan pa ang pwersa sang Philadelphia 76ers sa National Basketball Association (NBA) matapos nakuha sini ang 34-anyos kag nine-time All-Star nga si Paul George para sa apat ka tuig kag $212 million ukon P12.46-billion nga free-agent contract.
Natalana nga pirmahan ni George ang kontrata kun matapos na ang moratorium on signings sang NBA sa Hulyo 6.
Makaupod na sini sa Philadelphia ang 2023 NBA MVP nga si Joel Embiid kag ang All-Star guard nga si Tyrese Maxey nga amo man ang ginalantaw nga mangin kabahin sang “most formidable trios” sa liga.
Antes sa 76ers, lima ka tuig si George sa Los Angeles Clippers kag naka-average sang at least 21.5 points kada season. Sa 14 ka tuig sini nga karera, nakaupod man ini sa Indiana kag sa Oklahoma City.
Nangin six-time member siya sang All-NBA Team; four-time member sang NBA All-Defensive Team; kag nangin most improved player sang NBA sang 2013.
Nangin finalist man si George sa NBA MVP kag Defensive Player of the Year sang 2019 sang nagpanguna ini sa liga sang amo nga tion nga may 2.21 steals per contest.
