ILOILO CITY-Ginpasakaan na sang kaso ang anay katapo sang Philippine Army nga nadakpan sa ginpatigayun nga entrapment operation sang National Bureau of Investigation (NBI) bangud man sa pagpanunto.
Sa interview sang Bombo Radyo kay Special Investigator Aristedes Bañares, iya ginpahayag nga ginpasakaan na nila sang kaso nga Estafa ang anay soldado nga si Shawn Baaya Agregado, 22, sang Valeria Street, Iloilo City.
Mahimo man suno kay Bañares nga pasakaan sang kaso nga paglapas sa Republic Aact 10591 ukon Comprehensive Firearms and Ammunitions Regulation Act ang anay suldado matapos napaslawan nga magpakita sang nagakaigo nga dokumento sa ginapanag-iyahan nga .45 caliber pistol lakip na ang kaso nga Usurpation of Authority.
Dugang pa ni Bañares, tatlo ka mga ginapahayag tagreklamo ang nagpalapit sa NBI kag ginreklamo ang anay suldado bangud sa pagpangayo sang kwarta kabaylo sang pag-apply sa Philippine Coast Guard (PCG) kag Philippine Army.
Nahibaluan nga nangin isa ka sulado si Agregado sang tuig 2017 apang gindischarge sang 2018 bangud sa iya Absence Without Leave (AWOL) sa serbisyo.
