Nagpasalig si Justice Secretary Jesus Crispin Remulla nga wala ini sang santuhon sa imbestigasyon sa tanan nga opisyal sang National Bureau of Investigation (NBI) nga involved sa pagpasugot nga makasulod-guwa sa detention ang isa ka detainee.
Matandaan nga si Jose Adrian “Jad” Dera nga co-accused sa drug case batok kay detained former Senator Leila de Lima ang nag-ako mismo sa imbestigasyon sang Senado nga nagguwa ini sa detention facility sang NBI sang anum gid ka beses.
Duha ka beses ini nga nagkadto sa ospital, kag nakakadto man sa Tagaytay, Cavite kag Calatagan, Batangas. Ang katapusan nga unauthorized trip ni Dera ang natabo sang Hunyo 20 sang gab-i agud magkaon sa isa ka hotel sa Makati.
Gindakop ini lakip ang security personnel sang NBI sang nagbalik na siya sa detention facility sa Taft, Manila sang tungang gab-i.
Pahayag naman ni Secretary Remulla, imbestigaran ini kag pasabton ang tanan nga may kahilabtanan.
Una naman nga ginpahayag ni Dera sa Senado nga nagpasugot ang head sang NBI security management section sa iya pagguwa sa amo nga pasilidad.
Gina-imbestigaran man subong sang Department of Justice (DOJ) kag NBI ang reports nga nagbayad si Dera agud nga maangkon ang amo nga pribilehiyo sa presuhan. #
