ILOILO CITY- Gin-athag sang National Commission on Indigenous People nga may yara sang mga ginatanyag nga bulig ang nagkalain-lain nga ahensiya sang gobyerno para sa mga Badjao.
Sa interview sang Bombo Radyo kay Atty Hermie Jun Toledo, Regional Hearing Officer sang National Commission on Indigenous People Region 6 kag Region 7, iya ginpahayag nga sa pagkamatuod, may yara sang mga livelihood programs para sa amo nga indigenous group.
Suno sa iya, halimbawa diri amo ang established Badjao Communities sa Cebu City, Bato, Leyte; kag Isabel, Leyte nga ginabuligan sang National Commission on Indigenous People, Department of Social Welfare and Development Office, kag mga Local Government Units agud mangin maayo ang ila pangabuhi.
Ini ang rason, pahayag ni Toledo, kun ngaa may yara sa gihapon nga mga Badjao nga nagapangayaw sa iban nga mga lugar ilabi na diri sa Western Visayas.
Nagapati naman ang natungdan sa posibilidad nga indi bastante ang mga basic services nga ila nakuha ukon may nagakatabo nga human trafficking.
Matandaan nga nangin mainit ang isyu angot sa mga Badjao sang ginpapauli sila sang Bacolod City Government sa ila lugar sa Zamboanga apang sa baylo nga sa Dumaguete City sila i-dulong, ginpasakay sila patabok sa Iloilo rason nga nagtumpok na naman sila diri sa syudad.
Bangud sa natabo, nangin mainit ang word war sa tunga ni Mayor Jerry Treñas kag Vice Mayor El Cid Familiaran kun sa diin gin-deklarar pa ni Treñas si Familiaran bilang persona non grata.
