ILOILO CITY- Ginpaidalom na sa Red (Infected) Zone ang New Lucena, Iloilo bangud sang African Swine Fever.
Ang deklarasyon nasaad sa gin-isyu ni Iloilo Governor Arthur Defensor Jr. nga Executive Order No. 46-C-2022 nga nagapalawig sang iya nauna nga Eexecutive Order No. 460-2022 ukon ang pagpatuman sang adjusted quarantine procedures and disease prevention and control measures batok sa African Swine Fever sa probinsya.
Sa interview sang Bombo Radyo kay Dr. Darel Tabuada,Iloilo Provincial Veterinarian, iya ginpahayag nga duha ka barangay sa New Lucena- ang Barangay Badiang kag Barangay Guinobatan- nga may positibo nga kaso sang balatian sa mga baboy nga nangin basehan sang deklarasyon.
Suno kay Tabuada, sakop sang .5 km radius sang index case sa Badiang ang Guinobatan.
Sakop man sang 0.5 kilometer radius sang ‘index case’ang Janipaan East, Mina nga may kaso sang balatian.
Bangud napaidalom sa Red Zone ang New Lucena, nagakahulugan nga ang movement sang live pigs, pork, pork products (fresh/frozen pork products and uncooked processed pork products, except cooked and canned processed pork products) kag swine genetic material sa sulod kag guwa sang nasambit nga banwa ang ginadumilian.
Nahibaluan nga magluwas sa New Lucena, una na napaidalom sa Red Zone ang banwa sang Oton nga may 31 ka barangay nga apektado, San Miguel nga may anom ka barangay nga apektado, kag Leganes nga may apat ka barangay nga apektado.
May kaso sang African Swine Fever ang Mina,Alimodian, kag Sta. Barbara apang ang mga infected barangays lang ang ginpaidalom sa Red Zone kag indi ang bilog nga banwa.
