Opisyal na nga gin-anunsyo sang International Criminal Court (ICC) nga ang beterano nga British-Israeli defense lawyer nga si Atty. Nicholas Kaufman ang gin-appoint nga mangin legal counsel ni former president Rodrigo Duterte.
Gin-file sang anay presidente ang pirmado nga sulat sang Marso 14 nga naga-nominate kay Kaufman bilang iya “lead defense counsel” sa ICC proceedings.
Base sa mga dokumento nga ginsapubliko kahpon, nagpakigkita ang ICC registry kay Duterte sang Marso 17 kag ginkumpirma sini ang appointment sang amo nga abogado. Sa amo man nga adlaw, ginbaton ini ni Kaufman.
34 ka tuig na ang eksperyensya ni Kaufman sa international law.
Lakip sa iya ginrepresentar sa korte amo si Congo Vice President Jean Pierre Bemba kag former Central African Republic (CAR) minister Maxime Mokom nga pareho kay Duterte ginkasuhan man sang crimes against humanity sa ICC.
Sa subong suno kay Kaufman, ginakumpleto pa niya ang iya nga team, apang ginpasalig sini nga mangin mabakod ang iya pagdepensa para sa former president.
Magluwas sa paghatag sang strong defense, nagalaum man si Kaufman nga mabalik si Duterte sa Pilipinas.
Nauna na nga ginpahayag ni Vice President Sara Duterte nga indi na mangin kabahi sang defense team sanday former executive secretary Salvador Medialdea kag former presidential spokesperson Harry Roque, baliskad sa nauna gin-anunsyo sang kampo sang former president.
