Naghilibion ang screen veteran nga si Niño Muhlach samtang nga ginbalikan sini ang natabo sa iya anak nga si Sandro nga bag-uhan pa lang sa showbiz apang gina-alegar nabiktima sang pagpangmolestya sang duha ka independent contractors sang isa ka TV network.
Ginplastar ini ni Niño kadungan sang hearing sang Senate Committee on Public Information and Mass Media nga naga-imbestigar sa allegations sang sexual abuse, Agusto 7.
Pahayag sini, nagalain ang iya buot bangud kun sin-o pa ang may sala, sila pa ang may gana nga magbaliskad sag istorya.
“Kasi para makita mo ‘yung anak mo na nanginginig at hindi niya halos mahawakan ‘yung telepono niya nung kwine-kwento niya sa akin yung ginawa sa kanya,” pahayag ni Niño. “Sabi sa akin ni Alonzo, sinabihan daw siya ng kuya niya na, ‘Bro, sana huwag mangyari sa iyo ‘yung nangyari sa akin.’”
Ginsiling man sini nga kun nasarangan ini himuon sa ila pamilya nga may pundasyon na sa showbiz industry, ano pa gid ayhan ang nahimo sa iban nga bag-uhan kag wala pa sang tingog.
“Hindi ko naman po binubuhat ‘yung aming bangko pero sa isang pamilya na talagang naging malaki na ang kontribusyon sa industriyang ito, what more na sa iba? What more sa mga baguhan?” dugang sang aktor.
Nagapaidalom subong si Sandro sa counseling kasunod sang insidente kag kasunod man ang pag-file sang kaso sa National Bureau of Investigation (NBI).
Matandaan nga gina-alegar natabo ang pag-molestya kay Sandro kadungan sang gala night sang TV network sang nagligad nga Hulyo.
Ang duha ka respondents sa kaso nga sanday Richard Cruz kag Jojo Nones ang gindagdagan sang Senado sang subpoena ad testificandum matapos nga nagpadala lamang ang mga ini sang sulat nga nagapangayo sang pasensya nga indi sila makatambong sa hearing.
Gusto man ni Senate President Pro Tempore Jinggoy Estrada nga mag-atubang si Sandro sa Senate committee apang ginsiling sang iya nga abogado nga naga-eksperyensya pa ini sang trauma.
Base sa paathag ni NBI Chief for Anti-Graft Division Marie Catherine Nolasco-Illescas, nagpaidalom ang solterito sa behavioral science evaluation nga rason man kun ngaa may rekomendasyon nga limitahan anay ang iya public exposure.
Kadungan sang amo nga hearing, nagtambong man ang representatives sang media companies kun sa diin ginsigurado sa atubang sang committee nga may mechanisms para nga protektahan ang ila workers batok sa sexual abuse.
