Apat ka tawo ang patay sa panibag-o nga pagpaulan sang Russia sang missiles sa Ukraine.
Ang tatlo ang reported nga napatay sa central city of Kryvyi Rih, samtang napatay naman ang isa sa sunog sa southern Kherson region matapos nga ginbombahan ang isa ka apartment block antes ang missile strike.
Nahalitan man ang siyam ka energy facilities kag napilitan ang Kyiv nga mag-introduce sang emergency blackouts sa bilog nga pungsod apisar sang winter kun sa diin kinahanglanon gid kuntani sang tawo ang kuryente agud mabatuan ang katugnaw.
Ginlaragway nga isa ini sa largest missile barrages nga natabo halin sang gin-atake sang Russia ang Ukraine sang Pebrero subong nga tuig.
Ginapahayag nga na-intercept sang air defences ang 60 out of 76 incoming missiles nga ginpalupad sang Moscow sa critical infrastructure.
Suno pa sa top general sang Ukraine, gintinguhaan pa sang Russia nga i-distract ang air defences paagi sa pagpalupad sang warplanes malapit sa Ukraine.
Ang atake sa Kryvyi Rih ukon sa hometown ni President Volodymyr Zelenskiy ang nagbilin man sang 13 ka mga pilason lakip na ang apat ka kabataan.
Ginapahayag nga minilyon na ang wala sang kuryente kag nadulaan sang critical services halin sang nagpang-atake ang Russia sa energy grid sang Ukraine.
Ginalantaw sang mga eksperto nga ang sulit-sulit nga missile and drone attacks halin sang October amo ang isa sa mga estratehiya sang Kremlin agud nga i-terrorize ang Ukrainians. ##
