Ginbalik-balikan ni former Secretary of Presidential Communications Office Herminio “Sonny” Coloma Jr. ang tyempo sang nagaserbe pa nga presidente si former President Benigno Simeon ‘Noynoy’ Aquino III.
Sa exclusive interview sang Bombo Radyo kay Coloma, iya ginpahayag nga ang wala mahibal-an sang publiko — sa likod sang isa ka lider nga nagpungko bilang pinakamataas nga opisyal sang pungsod — simple nga tawo si Aquino kag palalahog man bisan sa iya nga Gabinete.
Indi maluho si Aquino suno kay Coloma kag ang kalipayan lamang sini pagkatapos sang makapoy nga trabaho amo ang makakaon sang iya paborito nga pagkaon.
Sa weekend suno kay Coloma, kun mahimo pa lang, wala gid nagapang-disturbo sang iya nga mga opisyal si Aquino bangud gina-respeto sini ang family time sang mga tawo.
May mga tsismis nga nagapahayag nga masami naga-video games si Aquino kag tamad nga klase sang opisyal.
Apang suno kay Coloma, baliskad ini sa batasan sang anay presidente.
Wala nagapirma si Aquino sang mga dokumento nga indi niya mahangpan; ang ginahimo suno kay Coloma, ginatawag ang bilog nga Gabinete, ginapamangkot ang concerned Cabinet Secretary sa bagay nga indi niya mahangpan, kag gina-diskusyunan ang desisyon.
