Nagsaka naman sa 81 ang numero sang mga napatay sa nagluntad nga linog sa Mindanao sang Hunyo 8, samtang 31 naman ka tawo ang padayon nga ginapangita.
Ini base sa latest situational report sang National Disaster Risk Reduction and Management Council (NDRRMC).
May kabug-usan nga 1,315 ka tawo ginkumpirma nga nasamaran, apang suno sa ahensya nga ginacheck pa ang iban nga reports para sa validation.
Nagalambot sa sobra 380,000 ka pamilya ukon 1.63 million ka mga indibidwal ang naapektuhan sa kapin 600 ka barangay sa Region 9, 11, 12 kag Bangsamoro Autonomous Region in Muslim Mindanao (BARMM).
Sa mga naapektuhan, kapin 89,000 ka indibidwal ang padayon nga na-displaced, kag 23,000 ang nagapabilin sa evacuation centers.
May ara man sang kapin 63,000 ka mga tawo nga temporaryo nga nagapuyo sa balay sang ila mga paryente.
Sa damage assessment, naglab-ot na sa masobra 87,000 ka mga balay ang naguba, lakip na ang totally damaged kag partially damaged nga mga struktura.
Nagsaka na sa ₱1.356 bilyon ang kabug-usan sang danyos sa imprastruktura sa mga apektado nga rehiyon.
Bangud sa sini nga sitwasyon, padayon nga napa-idalom sa state of calamity ang 18 ka siyudad kag munisipalidad sa mga apektado nga lugar.
