ILOILO CITY- Ginakabig sang Office of the Civil Defense – Western Visayas nga tuman ka importante ang assessment sa kada local government unit sa Western Visayas sa tion sang kalamidad.
Sa subong, nakumpleto na sang Probinsya sang Aklan, Antique, Capiz kag Guimaras ang asessment report ukon ang checklist nga may corresponding plans kag measures sa lugar nga masami may yara sang hazard.
Sa interview sang Bombo Radyo kay Ma. Aletha A. Nogra, officer-in-charge sang Office of the Civil Defense Western Visayas, iya ginpahayag nga nagapadayon ang assessment sang mga local government units sa hazard areas sa ila tagsa ka areas of responsibility.
Nagapabilin naman ang Iloilo kag Negros Occidental nga wala pa sang kumpleto nga assessment report apisar nga nakapasa na ang pila ka mga kabanwahanan sa Office of the Civil Defense Western Visayas.
Suno kay Nogra, pinaagi sa Gawad KAlamidad at Sakuna LAbanan SAriling Galing ang Kaligtasan (KALASAG), mahatagan sang pagkilala ang mga local government units nga nagpanikasog kag nagpakita sang kahandaan ukon disaster preparedness sa ila tagsa ka komunidad.
Ginpahayag dugang sang natungdan nga katungdanan sang opisina nga ma-set ang standard kag guidelines nga dapat sundon sang mga local government units sa tion sang kalamidad.
