ILOILO CITY – Gin-athag sang Office of the Vice President nga ang pagbakal sang masobra sa P600,000 nga balor sang equipment nga una nga gin-flag sang Commission on Audit bangud sa kapaslawan nga magsunod sa procedures, ang nakapasar sa audit sang ahensya.
Ini ang ginpahayag sang Office of the Vice President kasunod sang panawagan ni House Deputy Minority Leader kag Alliance of Concerned Teachers (ACT-Teachers) party-list Representative France Castro sa nasambit nga opisina bangud sa gina-alegar nga pag-agi sa shortcut sa procurement rules sa pagbakal sang mga items para sa satellite offices sini.
Base sa 2022 Annual Audit Report sang state auditors, napaslawan ang Office of the Vice President nga magsunod sa proseso kag mga pagsulundan nga gin-require sa idalom sang Procurement Law or Republic Act 9184 kag sa implementing rules and regulations sa pagbakal sang pila sang Property Plant and Equipment kag Semi-Expendable Equipment para sa satellite offices nga nagadangat sa P668,197.20.
Ang gilayon nga pagtukod sang satellite offices apisar nga wala sang nagaka-igo nga equipment agud nga mag-operate ang nagduso sa management nga magbakal sa gilayon sang Property Plant and Equipment kag semi-expendable property gamit ang kwarta sang mga opisyal sini kag ginbayran lamang pinaagi sa reimbursement.
Una na nga nagpanawagan si Castro sa Office of the Vice President nga magpaathag kag magkooperar sa mga imbestigador may kaangtanan sa findings sang state auditor, kag nagpanawagan man ini sa concerned government agencies nga magpatigayon sang maid-id nga pagtuon sa procurement processes kag overall budget sang Office of the Vice President, sang Department of Education, kag sang National Task Force to End Local Communist Armed Conflict agud nga masiguro ang ila nga compliance sa gintukod nga pagsulundan.
Si Vice President Sara Duterte ang nagaserbe nga concurrent Department of Education Secretary kag co-vice chairperson sang National Task Force to End Local Communist Armed Conflict.
Pahayag dugang sang mamalidha, dal-on niya ang isyu sa Commission on Audit sa pala-abuton nga House deliberations sa budget sang Office of the Vice President para sa 2024.
Sa bahin naman sang Office of the Vice President, ginpahayag nila nga wala sila nakabaton sang notice of suspension ukon disallowance nagikan sa state auditors bangud sang nasambit nga procurement.
Ang Office of the Vice President sa idalom ni anay Vice President Leni Robredo ang ginhatagan sang Commission on Audit sang unqualified opinion sa financial statements sini sa sulod sang sunud-sunod nga apat ka tuig humalin sang 2018 tubtob sang 2021.
Naga-issue sang unmodified opinion ukon unqualified opinion ang ahensya kun mapamatud-an nga ang financial statements ang preparado sa tanan nga material respects bilang pagsunod sa applicable financial reporting framework.
