Gin-report sang Philippine Coast Guard (PCG) nga nagsangkad pa ang oil spill sa dagat sa Oriental Mindoro sa six kilometers long kag four kilometers wide.
Maitom kag madamol ang oil spill nga na-locate malapit sa Balingawan Point sa Naujan, Oriental Mindoro.
Suno pa sa PCG, may gin-spray nga oil dispersants sa area matapos nakit-an sang Marine Environment Protection Unit ang maitom kag madamol nga oil sa nakolekta nga water samples.
Ginkumpirma man sang opisina nga nag-lugdang gid ang bilog nga MT Princess Empress kasunod sang natabo nga engine trouble. Ginapahayag nga yara na ang tanker sa kadalumon nga 460 metros kag imposible na para sa divers nga malab-ot ini bangud sa nagasaka nga underwater pressure.
Karga sang MT Princess Empress ang 800,000 ka litro sang industrial oil halin sa Bataan padulong sa Iloilo sang natabo ang amo nga insidente.
Ginpahayag man sang coast guard nga mgatukod ini sang crisis management committee samtang nga nagapadayon ang oil spill assessment kag response operation.
Hugot man ang monitoring nga ginahimo sang Department of Environment and Natural Resources (DENR).
Hilway na sa katalagman ang 20 ka crew members sang tanker matapos ginluwas sang international cargo vessel nga MV Efes kag gindala sa Subic, Zambales. ##
