ILOILO – Luyag ni Iloilo Governor Arthur Defensor Jr. nga magpadayon ang Operation Bulig Ilonggo apisar magtahaw na ang tensyon nga nagapatunga sa Iran kag Estados Unidos kag sa mga pungsod nga yara sa Middle East.
Ang Bulig Ilonggo ang ginlunsyar sang provincial government kaupod ang Department of Foreign Affairs (DFA), Overseas Workers Welfare Administration (OWWA), Department of Labor and Employment (DOLE) kag Philippine Overseas Employment Administration (POEA) agud mabuligan ang mga Ilonggo nga nagatrabaho sa Middle East kag matsekyar ang ila kahimtangan samtang nagapadayon pa ang kakugmat sa mahimo magluntad nga inaway.
Sa interview sang Bombo Radyo kay Defensor, iya ginpahayag nga wala pa man ang nasambit nga away, ginapanumdom na niya ang pagbutang sang help desk sa Provincial Capitol agud nga indi magduha-duha ang mga pumuluyo sa pagpalab-ot sang ila mga pamangkot kag problema.
Duha suno kay Defensor ang tinutuyo sang Bulig Ilonggo: makahatag sang linya sang komunikasyon sa tunga sang mga pamilya sa Iloilo kag sa Ilonggo Overseas Filipino Workers; kag, mapasangkad pa ang programa sa gobyerno kag mapalab-ot ini bisan sa luwas sang pungsod.
Ang ginalantaw lang nga problema suno kay Defensor amo nga kulang sang tinawo ang nasambit na nga mga ahensya.
Nahibaluan nga una na nga ginpahayag ni OWWA 6 Welfare Officer III Jack Arroyo nga maga-tinir ang help desk tubtob yara pa ang tensyon sa Middle East kag tubtob may yara pa sang nagakinahanglan.
