Balik na sa normal ang transaksyon sa mga opisina sa Alimodian Municipal Hall matapos ang pagpatigayon sang COVID-19 mass testing sa mga regular kag job hire employees.
Sa interview sang Bombo Radyo kay Mayor Geffre ‘Calay’ Alonsabe, iya ginpahayag nga sa 185 nga nga ginpaidalom sa swab test, apat ang nag-gwa nga positibo.
Sa apat nga positive cases, isa ang yara sa ospital sa syudad sang Iloilo, isa ang naka-facility quarantine, kag duha ang naka-home quarantine.
Wala man sang mga naka-close contact ini nga mga pasyente bangud nag-isolate na sila antes pa man ang swab testing.
Matandaan nga ginlockdown ang munisipyo umpisa sang Hunyo 14 kasunod sang pagpositibo sa COVID-19 sang tatlo ka empleyado nagikan sa Office of the Municipal Mayor.
