ILOILO – Indi masarangan sang drug buy bust operation ang pagtapna sang pagduging sang illegal drugs sa pungsod.
Ini ang rason kun nga-a ginlunsyar sang Philippine Drug Enforcement Agency ang Oplan Kalasag.
Sa interview sang Bombo Radyo kay Philippine Drug Enforcement Agency 6 Officer-In-Charge Alex Tablate, iya ginpahayag nga ang Oplan Kalasag ang isa ka programa agud nga matapna ang pagduging sang illegal drugs sa bulig sang mga tagdumalahan sang commercial establishment, Local Government Unit, Philippine National Police kag Department of Labor and Employment.
Suno kay Tablate, ang Oplan Kalasag ang may tema nga “Drug Free Workplace” sa diin ang Philippine Drug Enforcement Agency ang leading agency sa pagpatuman sang nasambit nga programa.
Ginpahayag ni Tablate nga indi magmadinalag-on ang Oplan Kalasag kun wala nagabulig ang Local Government Unit, business sector kag ang mga nanari-sari nga ahensya sang gobyerno.
Indi man mahinago suno kay Tablate nga may nagakatabo nga illegal drug transaction sa sulod sang hotel, bar, condominium kag iban pa nga sahi sang commercial establishment rason nga mas maayo nga matapna ang kasubong sini nga buluhaton.
May kangtanan diri, magapatigayon man sang seminar kag symposium ang Philippine Drug Enforcement Agency agud nga ipahangop sa publiko kun nga-a dapat likawan ang paggamit kag pagbaligya sang illegal drugs.
