ILOILO – Nakalab-ot na sa 1st reading ang ordinansa nga ginaduso ni Second District Board member Jun Mondejar may kaangtanan sa pagpahamtang sang safety measures kag safety signages sa mga dalanon nga ginakay-o nga masami ginatunaan sang aksidente sa probinsya sang Iloilo.
Sa interview sang Bombo Radyo kay Board Member Jun Mondejar, iya ginpahayag nga ang kaundan sang nasambit nga ordinansa ang naga require sa mga contractors nga magpahamtang sang safety measures sa mga ginakay-o nga dalanon ukon taytay.
Suno kay Mondejar ini ang base man sa nangin priviledge speech ni Iloilo Vice Governor Christine “Tingting” Garin sa regular session sa Sanguniang Panlalawigan natuhoy sa pila ka nagapadayon nga paglapas sang mga contructors sa traffic management layout sang Department of Public Works and Highways nga pagpahamtang sang safety signages sa nga ginakay-o nga dalanon ukon taytay.
Dugang sang natungdan, ang pagduso kag pagpasar sang nasambit nga ordinansa ang supplemental effort sang provincial government agud malikawan na ang masami pagluntad sang aksidente sa dalanon bangud wala sang nakahamtang nga mga safety signages.
Santo sa pahayag ni Mondejar, sa tion nga mapasar ini iga implementa sang local government sa kada banwa sa probinsya samtang magabaton naman sang nagakaigo nga penalidad ang mga constructor nga magalapas sa nasambit nga ordinansa kun sa diin P5,000 ang ika una nga opensa, P5,000 kag may dugang pa nga penalidad nga nakadepende pa sa nakasaad sa ordinansa ang ika duha nga opensa kag P5,000 naman kag pagka preso sa sulod sang 15 ka adlaw ang ikatatlo nga opensa.
