ILOILO – Napasar na sa second reading ang ordinansa nga ginduso nanday Councilor Rudolph Ganzon kag Councilor Jay Treñas nga amo ang Ordinance Regulating the Use of Public Plaza.
Sa interview sang Bombo Radyo kay Iloilo City Councilor Jay Treñas, iya ginpahayag nga katuyuan sang nasambit nga ordinansa amo ang tipigan kag protektahan ang mga public plaza sa syudad sang Iloilo.
Suno kay Treñas katungdanan sang City Enviroment and Natural Resources Office ang pag mentenar kag ang pagpatahom sa mga public plaza.
Pagabuksan naman ang mga public plaza humalin sa alas kwatro sa aga tubtob alas dose sang kaagahon, samtang alas kwatro sa aga tubtob alas dies naman sa gab-i para mga menor de edad ini ang pagsunod man sa curfew for minors.
Dugang sang natungdan, madamo man sang dapat dumilian sa sulod sang mga public plaza agud ma mentenar ang katahom sini kaangay nalang sang pagpatindog sang permente nga mga establisyemento, ginadumilian man ang magtanom kag magtandog sang mga tanom, indi man pwede ang mga tuman kagahod nga sonata nga maka distorbo sa mga tawo nga nagapahuway sa plaza.
Hugot man nga ginadumilian ang mga nagabaligya, kag ang pagpasulod sang mga makahululubog nga ilimnon, mga salakyan kaangay sang bisekleta kag nagakadapat man nga may yara sang higot ang mga hinuptanan nga ginadala sa public plaza.
