ILOILO – Mas mahatagan na sang dugang nga pagtamod ang mga elementary kag high school nga atleta sa probinsya sang Iloilo.
Ini bangud sa pinakauna nga ordinansa nga gin-sponsor ni Board Member Matt Palabrica kag gin-co sponsor ni Iloilo Vice Governor Christine “Tingting” Garin sa 13th Sangguniang Panlalawigan.
Ginatawag ini nga ‘an ordinance granting educational and or financial assistance and incentives to Iloilo provincial elementary and secondary athletes‘.
Sa interview sang Bombo Rdayo kay Palabrica, iya ginpahayag nga magatukod sila sang screening committee sa probinsya agud mapili sang maayo ang mga scholars kag insakto ang kadtuan sang fund.
Magahimo man sang Implementing Rules and Regulations (IRR) agud mahibaluan ang mga limitasyon kag kasangkadon sang ordinansa.
Sa kabilugan, may yara na ini sang budget nga apat ka milyon ka pesos nga nagikan pa sa Regional Development Fund (RDF) sang provincial government.
Sa idalom sini nga ordinansa, hatagan sang P2000 allowance kada bulan ang student-athlete, P2000 para sa book allowance bilog nga tuig, kag P2000 man para sa school uniform.
Dugang ni Palabrica, ini ang makabulig protekta sa mga atleta sang probinsya bangud subong, suno sa iya, amat-amat na nga ginakuha sang Metro Manila universities ang mga sagad nga mga atleta nga tumandok sang Iloilo.
Bisan ang syudad sang Iloilo ang nagakuha sang atleta sa probinsya suno kay Palabrica.
Nagalaum ang board member nga magatener na sa ila banwa kag munisipalidad ang mga atleta kon mahibaluan nila nga may incentives sila gikan sa gobyerno.
