Buhin-buhinan na ni President Ferdinand ‘Bongbong’ Marcos Jr. ang iya mga byahe sa luwas sang pungsod subong nga tuig.
Suno sa presidente, kinahanglan pa nga tipunon sang iya administrasyon ang investment pledges nga naangkon sa iya walo ka overseas trips nga napatigayon halin sang nagpungko siya sa pwesto.
Sabat ini sang presidente sang ginpamangkot kun paano ma-garantiya sang iya administrasyon nga ma-convert man sa aktwal gid nga investments ang investments nga ginpangako pa lang sang iban nga mga pungsod sang nagkadto didto si Marcos.
Sa subong suno pa kay Marcos, ang lamang kumpirmado nga presidential trip amo ang iya pagtambong sa Asia-Pacific Economic Cooperation (APEC) Summit sa Estados Unidos sang Amerika sa Nobyembre.
Naga-preparar man ang Malacañang para sa state visit sini sa Japan sa masunod nga bulan.
Matandaan nga ang katapusan nga byahe ni Marcos amo ang pagpadulong sa World Economic Forum sa Switzerland apang antes sini, may state visit siya sa Indonesia, Singapore, kag China; nagtambong sa United Nations General Assembly sa New York; nagpasakop sa ASEAN 2022 sa Cambodia; nagpartisipar sa APEC 2022 sa Thailand kag sa EU-ASEAN Summit sa Brussels, Belgium.
Ginakwestyon man sang mga kritiko kun ngaa walo gid ka official overseas trips ang nahimo sini dala ang tuman ka daku nga delegasyon kag ginakwestyon man kun ano ka daku nga pondo sang gobyerno ang ginagamit para diri.
Ginpasalig naman ni Marcos nga ipaguwa sang Malacañang ang breakdown sang gasto sa iya nga foreign trips kun matapos na ang accounting sa palasyo. ##
