ILOILO CITY- Natalana nga i-deploy sang opisina ni Vice President Sara Duterte ang “Kalusugan Food Trucks” sa pila ka mga areas sa bilog nga pungsod agud ma- address ang malnutrisyon sa mga kabataan sa eskwelahan.
Suno kay OVP Local Affairs and Special Programs Division chief Norman Baloro, ang Office of the Vice President Kalusugan Food Truck isa ka programa nga nagatuyo nga mabuligan ang mga bata nga nagasuprir sang malnutrisyon, gutom kag mahinay nga development.
Ginpahayag ni Baloro nga ang programa ang ipatuman upod sa Department of Education kag Department of Health paagi sa National Nutrition Council.
Tatlo ka food trucks ukon tag-isa sa Luzon, Visayas kag Mindanao ang inisyal nga gamiton para sa programa.
Suno pa kay Baloro, ini nga trucks ang ginpahulam sa OVP tubtob sa 2028 sa idalom sang usufruct agreement.
Ini ang regular nga magapondo sa identified nga eskwelahan nga may problema sa malnutrisyon kag gutom.
Suno kay Baloro, ang proyekto magasunod sa 120-day feeding program menu nga ginarekomendar sang National Nutrition Council.
Siyam ka eskwelahan ang target kada tuig–tatlo sa Luzon, tatlo sa Visayas,kag tatlo sa Mindanao.
Dugang niya, ang food trucks mahimo man magamit bilang “augmentation resource” sa pagserbe sang pagkaon sa mga biktima sang kalamidad.
