ILOILO CITY – Ginaduso sang mga opposition lawmakers nga halinon ang P150-million nga confidential funds sang Department of Education.
Suno sa mga mamalidha, mas mapuslan ini kun gamiton sa iban nga programa sang ahensya agud nga ma-address ang kinahanglanon sang amo nga sektor.
Matandaan nga una na nga ginpahayag ni Vice President kag Education Secretary Sara Duterte nga ang confidential funds sa idalom sang Department of Education sa proposed 2023 budget ang para sa pag-address sang illegal activities nga naga-target sa mga estudyante.
Apang suno kay Albay First District Rep. Edcel Lagman, mas maayo kun gamiton ang amo nga kwarta para sa Special Education program sang ahensya nga wala sang may nakuha nga allocation sa idalom sang proposed budget.
Suno naman kay Davao de Oro First District Rep. Maria Carmen Zamora nga amo ang sponsor sa budget sang ahensya sa ginpatigayon nga House plenary deliberations, ang Department of Education ang nag-realign na sang pondo sang nagligad nga mga tinuig sang wala sang may nakuha nga funding ang Special Education program.
Ginaduso naman nanday Gabriela Party-list Rep. Arlene Brosas kag Kabataan Rep. Raoul Manuel nga gastuhon ang confidential funds sa child protection.
Suno pa kay Brosas, ini ang maka-provide pa sang linibo ka mga armchairs kag minilyon ka mga textbooks para sa eskwelahan agud nga ma-address ang learning crisis.
