Ginpahat-pahat sang Commission on Audit (COA) sa irregular, unnecesary ukon excessive ang P557 million nga balor nga gingasto sang Department of Health (DOH).
Sa audit report sa DOH, natukiban sang COA ang P549,409,866 nga gingasto bilang iregularidad; P1,221,613 nga gingasto sa indi man lang kinahanglanon kag P7,068,268 ang gingasto sang sobra.
Sa idalom sang irregular expenditures, nakit-an sang COA ang irregularities sa paggasto sang masobra P11 million nga pondo para sa pagkaon kag incidental allowance sang Bureau of Quarantine personnel may kaangtanan sa COVID-19 reponse humalin Abril tubtob Hunyo 2020.
Ang paggasto sang DOH suno sa COA ang wala sang specific legal basis.
Sa audit report sang COA, naggasto man sila sang masobra P2 million nga pondo para sa hazard pay sa Davao Regional Medical Center.
Suno sa COA, 134 ka mga emplyado sang nasambit nga ospital ang nahatagan sang hazard pay bisan nga wala man nagareport physically sa trabaho.
Nakit-an man sang mga state auditors ang iregularidad sa pagbayad sang P2,307,683 para sa special risk allowance sang mga empleyado sang Vicente Sotto Memorial Medical Center sa Cebu, nga indi man dapat kwalipikado bilang public health workers.
Ginrekomenda sang COA si DOH Secretary Francisco Duque III nga manduan ang iban pa nga mga opisina sang DOH nga sundon ang tanan nga rules, regulations, procedural guidelines, policies, principles ukon practices agud malikawan ang disallowances kag ini ang ginpaboran naman sang tiglikom.
