ILOILO CITY – Gin-ako sang Department of Social Welfare and Development nga isa sa mga kabangdanan kun ngaa nagaka delay ang pagpanghatag sang ayuda gikan sa Social Amelioration Program sang ila talatapan amo ang pabag-o bag-o nga pagsulundan.
Sa interview sang Bombo Radyo kay Teresa Gelogo, Focal Person sang Iloilo City Social Welfare and Development Office iya ginpahayag nga mas gina id-idan na subong sang mga barangay officials ang mga listahan sang mga malakip sa nasambit nga programa bangud pat-ud man nila nga may yara sang baylo nga silot sa tion nga may yara sila sang ilakip nga indi kwalipikado.
Suno kay Gelogo, ginatinguhaan man sang mga barangay officials nga ilakip sa listahan ang tanan nga mga pumuluyo sang ila barangay apang may yara sila sang dapat sundon nga pagsulundan kag gina likawan gid ang pagpasaulod sa mga indi kwalipikado.
Dugang sang natungdan, katungdanan na sang Department of Social Welfare and Development nga i-asses ang mga yara sa listahan kag indi ini iya sang mga barangay officials.
Santo sa pahayag ni Gelogo, nabudalayan man sila sa tanan nga mga nabaton nila nga reklamo kag pamangkot apang bangud sa bulig sang Iloilo City Government nalampuwasan nila ini.
Nahibaluan nga nagdangat na sa 34 ka mga barangay sa syudad ang nakabaton na sang nasambit nga ayuda.
