Nagpatawag si House Speaker Martin Romualdez sang inquiry sa Kamara agud maimbestigaran ang “makaduluda” nga pag-absent sang police escorts ni Negros Oriental Governor Roel Degamo sang adlaw nga ginpatay siya kag ang walo ka iban pa nga indibidwal sa Pamplona, Negros Oriental.
Gintugyan ni Romualdez sa House Committee on Public Order and Safety ang imbestigasyon bangud nagaguwa suno sa iya nga nakahibalo ang mga suspek nga wala sang proteksyon si Degamo sang amo nga adlaw rason nga nahapusan sila nga himuon ang misyon nga asasinasyon.
Ginpahayag ini sang house speaker kasunod sang impormasyon nga wala nakapakita sa duty ang lima sa anum ka Philippine National Police (PNP) security personnel nga naka-assign kay Degamo sang Marso 4 nga amo ang adlaw nga natabo ang krimen.
Suno pa kay Romualdez, naka-report na nga daan si Degamo sa pulis nga may pagpamahog siya nga nabaton gani dapat nga nangin mas istrikto ang pagbantay sang iya nga security detail.
Gindugang pa sini nga sa imbestigasyon nga himuon, hibaluon indi lamang ang rason sang kwestyonable nga akto sang mga police personnel nga assigned kay Degamo kundi dapat man pasiguruhon nga may bastante nga proteksyon nga mahatag ang pulis sa government officials nga yara sa delikado ang kabuhi.
Nagpaandam pa ang house speaker nga maga-rekomendar ang Kamara nga mag-file sang kaso-kriminal kun mapamatud-an sa congressional inquiry nga kahimbon sang mga suspek ang hanay sang pulis agud nga kakason ang security protection kay Degamo sang amo nga adlaw.
Sa bahin sang Senado, una na nag-react si Senator Joseph Victor “JV” Ejercito nga indi makabig nga “natabuan lang” nga nangindulaan ang lima sa anum ka security detail ni Degamo sang amo nga adlaw.
Sa bahin naman sang PNP, ginpahayag sang spokesperson nga si Pol. Col. Jean Fajardo nga nagmandu na si Secretary of Interior and Local Government Benhur Abalos sa militar kag pulis nga i-account ang tanan nga security personnel nga assigned kay Degamo sang amo nga adlaw kag lakip na ini subong sa gina-imbestigaran.
Si Abalos ang chair sang Special Task Force (STF) Degamo samtang sanday Secretary of Justice Crispin Remulla kag Secretary of National Defense Carlito Galvez Jr. naman ang co-chairpersons. ##
