ILOILO CITY – Natalana nga makigsapol si Iloilo City Councilor Ely Estante, chairman sang committee on market and slaughterhouse, kay Local Economic Enteprise Office (LEEO) Head Ariel Castañeda kag sa Executive Assistant for market and slaughterhouse subong nga adlaw, Enero 7.
Ini agud maistoryahan na ang mga lihok kaangot sa mga problema sa nagadamo nga talipapa sa syudad kag amo man ang problema sa Iloilo Fish Port Complex nga madugay na ginareklamo sang mga vendors sa syudad sang Iloilo.
Sa interview sang Bombo Radyo kay Estante, iya ginpahayag nga lantawon pa nila kun paano ma-regulate ang mga talipapa kag kun bala, mahimo naman nga makigsapol sa port manager sang Fish Port Complex ilabi na bangud natukiban nga may mga market vendors nga didto na nagabaligya sa fishing port bangud ginapahayag nga mas madamo ang customer sa amo nga lugar.
Dugang pa ni Estante, istoryahan man kun paano ma-engganyo ang dugang nga mga customer nga sa merkado magbakal sang ila mga kinahanglanon.
Nahibaluan nga nagareklamo ang mga Market Vendors Association sang mga merkado sa syudad bangud ginpahayag nga sang nagligad nga tuig pa ang mga ini nagpadala sang sulat sa Iloilo Fish Port Complex, apang tubtub subong, wala sa gihapon sang aktu ang pamunu-an.
Nahibaluan man nga santu sa reklamo sang mga vendors, makabig nga bagsakan ang Iloilo Fish Port Complex kun sa diin mahimo nga makabakal sang isda sa mas barato nga presyo kag wala sang malain kun may yara sang retail nga nagakatabo apang ang negatibo nga epekto sini amo nga nagakaputo sila nga mga fish vendor sa merkado.
