Gin-aprubahan na sang International Criminal Court (ICC) ang pag-resume sang imbestigasyon sa ginapahayag extrajudicial killings sa Pilipinas bangud sa drug war sa idalom sang administrasyon ni anay Presidente Rodrigo Duterte.
Sa statement nga ginpaguwa sang ICC Pre-Trial Chamber, ginsiling nga ginhatagan na sang go signal ang request ni ICC Prosecutor Karim Khan nga padayunon ang pag-imbestigar sa sitwasyon sa Pilipinas bangud sandig sa analysis sang chamber, indi kumbinsido ang international court nga nagapatigayon ang Pilipinas sang kaugalingon kag relevant nga imbestigasyon.
Kun naga-conduct kuntani sang relevant nga imbestigasyon ang Pilipinas, amo ini kuntani ang basehan agud nga ipaiway na sang ICC ang ila pag-intra sa imbestigasyon sa basis sang complementarity principle.
Ginpahayag pa sang Hague-based international tribunal nga “indi konkreto, indi tangible, kag indi progresibo” ang imbestigasyon sa Pilipinas.
Matandaan nga Septyembre sang nagligad nga tuig sang nagpanindugan ang Pilipinas nga wala na sang hurisdiksyon ang ICC sa Pilipinas. Ini bangud Marso 2019 sang epektibo nga nag-withdraw ang pungsod sa Hague-based body.
Pirmado man ni Solicitor General Menardo Guevarra kag sang lima ka assistant solicitors general ang argumento nga gina-imbestigaran sang Philippine government kag gin-prosecute ang gina-alegar nga mga krimen.
Ginpangbali naman ni Prosecutor Khan ini nga mga argumento. Sa iya sabat sa ICC PTC, ginpahayag sini nga napaslawan ang Pilipinas nga i-substantiate ang claim nga naga-function ang Philippine justice system.
Sandig sa official tallies sang otoridad, masobra 6,000 ang nagkalamatay nga drug suspects sa Pilipinas sa police operations sa tion ni Duterte halin sang 2016 tubtub sa 2022.
Kun basehan naman ang human rights groups, yara sa 30,000 ang ginpangpatay sang vigilantes kag sang perpetrators. ##
