ILOILO CITY – Ginpakamalaut sang pila ka mga mamalidha ang pag-veto ni President Ferdinand Marcos, Jr. sa hagna nga nagahatag sang tax exemption sa honoraria, allowances kag iban pa nga benepisyo para sa poll workers.
Suno kay Senate Minority Leader Aquilino “Koko” Pimentel III, tinutuyo sang Kongreso nga maghatag sang incentives sa katapo sang electoral board bangud sang mabudlay kag delikado nga trabaho.
Suno naman kay Deputy Minority Leader kag ACT Teachers Representative France Castro, ang pag-veto sang amo nga measure ang makabig nga isa ka tampa para sa mga manunudlo nga nagserbe sang nagligad nga eleksyon.
Kung madumduman, gin-veto ni Marcos ang House Bill No. 9652 kag Senate Bill No. 2520 ukon ang ginatawag nga “An Act Exempting from Income Taxation the Honoraria, Allowances, and other Financial Benefits of Persons Rendering Service during an Election Period.
Suno kay Marcos, wala nagasanto ini nga hagna sa Comprehensive Tax Reform Program.
Nahibaluan nga suno sa Department of Education, masobra sa 647,000 ka teaching kag non-teaching personnel ang naghatag sang ila nga serbisyo sang May 9, 2022 elections.
