Gin-athag sang isa ka abogado nga wala sang ano man nga epekto sa dalagan sang impeachment trial batok kay Vice President Sara Duterte ang pagpabalik ni impeachment court presiding officer Sen. Chiz Escudero sang “green box” sa Bureau of Internal Revenue (BIR).
Ang nasambit nga BIR box ang nagaunod sang tax records ni Vice Pres. Sara Duterte.
Sa interview sang Bombo Radyo sa people’s lawyer nga si Atty. Jobert Pahilga, iya ginpahayag nga importante nga masunod ang husto nga proseso sa pagpresentar sang mga dokumento sa impeachment trial agud mapabilin ang integridad sini.
Suno kay Pahilga, ang mga kahon sang dokumento nga ginaangot sa ikatlo nga Articles of Impeachment ang indi pa makabig nga opisyal nga ebidensya bangud wala pa ini pormal nga napasulod sa kustodiya sang Senate impeachment court.
Ginpaathag niya nga ginalauman nga magaisyu anay sang subpoena ang prosekusyon sa Bureau of Internal Revenue (BIR) agud legal nga masumiter ang mga dokumento sa husto nga tion sa trial.
Ginplastar man sang abogado nga may tatlo ka tikang sa pagpasulod sang documentary evidence. Una ang identification, kun sa diin ginakilala lamang ang dokumento kag wala pang pagpamalabag. Ginasundan ini sang presentation, kun sa diin mahimo na nga kuwestiyunon sang depensa ang admissibility sang mga dokumento. Ulihi amo ang offer in evidence, kun sa diin yara sa desisyon sang impeachment court kun batunon ukon balibaran ang mga ini bilang opisyal nga ebidensya.
Suno pa kay Pahilga, wala nagakahulugan nga awtomatiko na nga mangin ebidensya ang isa ka dokumento kun napresenta ini sa korte.
Suno pa diri, mahino pa sa gihapon nga indi ini pag-offer sang prosekusyon ukon dalayon nga balibaran sang impeachment court kun indi sini matuman ang mga ginplastar nga pagsulundan sa ebidensya.
