ILOILO CITY – Nagakadapat nga magbuligay ang tanan subong nga may yara sang Coronavirus Disease 2019 (COVID-19) pandemic.
Ini ang nangin sentro sang mensahe ni Msgr. Meliton Oso, director sang Jaro Archdiocesan Social Action Center, matapos ang ginpatigayon nga misa sa Jaro Metropolitan Cathedral.
Suno kay Msgr. Oso, nagakinahanglan nga magpangibabaw ang pagbinuligay ilabi na sa tion sang krisis.
Ginhalimbawa ni Msgr. Oso ang mga empleyado nga nagaserbe nga frontliners kag padayon nga nagatrabaho apisar sang ginapatuman nga Enhanced Community Quarantine.
Sa baylo nga ipatuman ang No Work, No Pay policy bangud sa lockdown, dapat pa gani nga swelduhan ang mga empleyado ilabi na ang mga wala sang may masakyan padulong sa ila opisina.
Mas makapaayo pa gid suno kay Msgr. Oso nga hatagan sang bisan gamay nga saka sa sweldo ang mga empleyado.
Ang gamay kag simple nga paghatag sang pabor suno sa natungdan ang isa na ka pagpakita sang pagtuo kag pagpalangga sa Ginuo.
